A lo llargo de la Historia d'Asturies la llucha siempre ta presente, dende les époques de los astures y romanos, pasando pela Edá Media fasta los nuesos díes, si bien na estaya de los años 60 piérdese'l valtu y les engarradielles y competiciones ente mozos o paisanos.
El xeógrafu y historiador griegu Estrabón, al serviciu del Imperiu Romanu cuenta nel so llibru III Geográphica:
“son mañosos n'emboscaes, áxiles, llistos,...Practiquen lluches ximnástiques, hoplítiques y hípiques. Exercitándose pal puxilatu, la carrera, les safadures y les batalles campales... así viven estos montañeses que como dixi son los qu'habiten nel llau septentrional d'Iberia, esto ye, los kallakoi, Astoures y kantabroi...”
Durante la estaya de la dominación romana practicáronse los xuegos que apurrió Roma como les lluchas ente homes y con fieres.
Na época romana y tamién visigoda la llucha practícase como exerciciu vigorizante y formativu.
Depués de la Reconquista la llucha emplegase como un preséu de gayola, así podemos topàr nel arte románicu capiteles, canecinos y metopes con representaciones d'escenes de llucha.
Ya nel sieglu XVIII topamos testimonios de dellos autores como Jovellanos (Xixón, 1790) que testifica que “el deporte de la Llucha nunca nun faltaba nes romeries del so tiempu y país”.
En 1895 Braulio Vigón fala d'un xuegu de llucha nomáu la Vuelta que consistía en “dos neños abrazábanese fuertemente y procuren baltar al so contrariu”
 |
| Valtu na Romería de Monte Alto, Uviéu 2005 |
Así, güei en día topamos testimonios orales de persones mayores en cualesquier fastera d'Asturies que nos falen de la mena d'engarriase, los finxos y les técniques, así como d'anéudotes o nomes de los meyores lluchadores de los pueblos. Los motivos de lluchar tienen que ver cola gayola y prestíu, p'arreglar disputes o pa marcar l'estatus de poder dientru d'un grupu social.
Tamién faénnos saber que s'iguaben competiciones ente pueblos y munches vegaes arbitraben los paisanos mayores que fueren bonos valtiadores.
Paez ser que'el conceyu d'Onís foi'l caberu n'escaecer esta llucha pues dexóse de lluchar na década de los 60.
CALTER:
La llucha asturiana Valtu practicábase per tol país, tanto n'Occidente como nel Centru o Oriente anque con variantes llocales.
Normativamente la característica más importante de la llucha Valtu ye l'agarre. Agarre nomáu bretón o “abrazu del osu” (asemeyáu al que s'emplega en Cumbria, Escocia/Alba o Northumberland) nel que'l brazu drechu pasa penriba del llombu izquierdu del contrincante y el brazu izquierdu perbaxu del sobacu, agarrándo les manes per detrás de la espalda del otru valtiador. Esti agarre nun se pue soltar durante la llucha.
Realizando trancadielles, golpes de cadril o llevantaes gana'l valtiador que valte tres vegaes al contrincante.
 |
| Valtu nel Forum 2004, Barcelona |
Autor: Daniel Arboleya
Bibliografía:
Fernánde, Gausón; Uxenu Barrio (1996): Deportes na tradición asturiana: Les Lluches.
Asturies: memoria encesa d'un país, nº 1-Xunu 1996. Conceyu d'Estudios Bibliográficos Belenos.
Ruiz Alonso,Jose Gerardo (2001): Juegos y deportes tradicionales en Asturias, Volumen II. Alborá Llibros, Xixón.
No hay comentarios:
Publicar un comentario