La tonada ye un fenómenu musical qu'abargana tanto un xéneru, como un estilu na música tradicional d´Asturies. El so raigañu cunde a un pasáu que se pierde nel tiempu, y que solo alcontramos algo d´ello dende final del sieglu XIX.
La tonada per aquellos tiempos alcontrábamosla na romería y nel chigre. Dientru la romería taba per un llau la música cantao o acompañao con gaita y tambor dientru la ilesia, y per otru la tonada sola o acompañada a la gaita. Nel chigre, facíase la tonada sola, cuando la xente venía del trabayu y yera'l momentu d´esparder, pero esti llugar solía tar acutáu a les muyeres. Nes espiches solíase cuntar pa cantar, col acompañamientu de la gaita, ya qu'escotábense mas perres pa la fiesta.
Dempués del "maxisteriu del chigre", onde la xente bebió la tonada fueron los discos de pizarra, que ye güei un factor perimportante de la tradición ya que la tonada pasó de tar basada namás na tresmisión oral, a poder pasar les fronteres xeográfiques y temporales. Esti xéneru ensin los discos correría la mesma suerte qu'otres músiques tradicionales.
A partir de los años 20 empincipiaron los concursos, y ye entós cuando ábrese una nueva dómina, que tendrá un periodu de másimu esplendor na década de los cincuenta y otra vegada nos ochenta.
Güei la tonada tién un nuevu impulsu con una serie de voces moces que tiren per campos diversos con collaboraciones en discos con xente como Hevia o Asturian mining company ente otros, dando-y otru coloríu al cantar tradicional.
Xosefina Argüelles cantante de tonada dementres cuarenta años, y maestra na escuela de música tradicional Manolo Quirós, cúntanos dende la so perspectiva como yera'l mundu la tonada fai unos años.
- ¿A qué edá empincipiaste a cantar?
A los 15 años nel concursu del periódicu Región, cellebráu nel teatru Capitol de Mieres. Participé con dos cantares, los únicos que sabía y que dependriera de la mió madre. Quedé la quinta de dieciocho o diecinueve muyeres.
Alcuérdome que taba de xuráu Juanín de Mieres y cuando fice la prueba pa poder concursar taba nerviosa como una vara verde, y cuando salí al escenariu el día del concursu, Juanín díxo-yos a los otros paisanos del xuráu que yeren nada más y nada menos que Cuchici, Miranda, Vazquez Prada y dalgún más que nun m'alcuerdo agora : "tái atentos a esta rapacina porque va desmayásenos en mitá´l cantar" pero la verdá ye que salí mui tranquila. Poques veces na mio vida tuvi asina nun concursu.
- ¿ D'onde te vién l'afición?
Enantes de cantar tonada prestábame'l cantar español. Participé en dos concursos " Buscando el éxito" y "Concurso de la Costa Verde" siempre quedé finalista porque lo que me fallába yera l'acompañamientu, entós desilusionéme y nun quise intentalo más.
Un día alcontré nel periódicu "Región" un cupón pa participar nel concursu de tonada. Taba caducáu, pero mandelu igual, y a los quince díes llamáronme pa facer la prueba.
-¿ Como yeren los concursos enantes?
Teníen casta, la xente cantaba autentico, como-yos salía del alma, ensin copiar de naide porque deprendíenlo namás que nes fiestes, nel chigre y pela radio porque tocadiscos nun lu tenía naide. Los mineros salíen de trabayar a les siete y diben pal chigre, y yeren les doce y taben tovía cantando.
Había más afición,la xente llenaba los concursos. Nes finales llegaben hasta dieciocho o venti muyeres, nel teatru Campoamor por exemplu, y teníes que cantar cuatro cantares y ensin micro. Yera otra cosa la verdá.
- ¿ Que diferencia alcuentres ente los cantantes d'enantes y los de güei?
Güei hai mui buenos cantantes pero falta-yos seguridá, nun arriesguen, falta la raza d'enantes. Hai que cantar ensin imitar a otros cantantes de lo antiguo. Hai que dalo too de ti mesma.
Xosefina ta güei retirada de los concursos, anque tovía canta en dalgunos alcuentros y prepara a muncha xente pa ser futuros cantantes.
Esta qu'escribe, aficionada por tradición familiar y güei cantante, espera que la tonada siga teniendo una bona salú per munchos años. El cantar tradicional forma parte de la nuesa cultura, y espero que con esti artículu garre más aficionaos.
Autora: Silvia Suárez
No hay comentarios:
Publicar un comentario